«Առանց շաքարի» պիտակը դեռ չի նշանակում անվտանգ․ սննդաբանը զգուշացրել է մանկական մրգային պյուրեների վտանգի մասին
Երեխաների համար նախատեսված մրգային պյուրեները շատ ծնողների թվում են անվնաս, օգտակար և հարմար տարբերակ։ Սակայն սննդաբան Մարիյաթ Մուխինան ՆՍՆ-ի հետ զրույցում զգուշացրել է՝ նույնիսկ այն պյուրեները, որոնց վրա գրված է «առանց շաքարի», միշտ չէ, որ կարելի է լիովին անվտանգ համարել։
Մասնագետի խոսքով՝ նման պյուրեները կարող են արյան մեջ գլյուկոզի մակարդակի կտրուկ բարձրացում առաջացնել։ Պատճառն այն է, որ մրգերը բնական շաքարներ են պարունակում, իսկ ջերմային մշակման և պյուրեի տեսքի բերելուց հետո դրանք օրգանիզմում ավելի արագ են ներծծվում։
Մուխինան նշել է, որ վերջին տարիներին բժիշկները ավելի հաճախ են արձանագրում 2-րդ տիպի շաքարախտի դեպքեր երեխաների և դեռահասների շրջանում։ Նրա խոսքով՝ պատճառներից մեկը կարող են լինել բարձր գլիկեմիկ ինդեքս ունեցող մթերքները, այդ թվում՝ չափից շատ օգտագործվող մրգային պյուրեները։
Սննդաբանը բացատրել է, որ ծնողները հաճախ նման արտադրանքը ընկալում են որպես քաղցրավենիքի առողջ փոխարինող։ Բայց «առանց շաքարի» գրությունը դեռ չի նշանակում, որ այնտեղ շաքար ընդհանրապես չկա։ Ավելացված շաքար կարող է չլինել, սակայն բնական շաքարների քանակը երբեմն բավական մեծ է լինում։
Մասնագետը խորհուրդ է տալիս մանկական սնունդ ընտրելիս չվստահել միայն փաթեթավորման գրություններին։ Կարևոր է ուշադիր կարդալ բաղադրությունը, հետևել չափաբաժնին և հաշվի առնել, թե երեխայի օրվա սննդակարգում որքան արագ ածխաջուր կա։
Մուխինայի խոսքով՝ մրգային պյուրեները պետք չէ ամբողջությամբ բացառել, սակայն դրանք պետք է դիտարկել ոչ թե որպես անսահմանափակ օգտակար սնունդ, այլ որպես արտադրանք, որը պահանջում է չափավորություն։